O museo está situado na torre de Bermúdez (séc. XVI), declarada Monumento Histórico-Artístico en 1976 e vinculada á familia de Valle-Inclán, xa que pertenceu ao seu avó e á súa avoa. O museo, de iniciativa municipal, foi creado en 1986 co obxectivo de conservar e difundir testemuños da obra e da vida do escritor.
Ramón del Valle-Inclán (1866 - 1936) é un dos escritores galegos máis representativos da literatura en lingua castelá, caracterizado pola súa vocación innovadora, o resentimento social e a técnica esperpéntica, e a eterna memoria do mundo rural galego. No museo achéganse datos da vida do escritor e da súa produción artística, así como referencias á época en que viviu e a personalidades con quen compartiu inquedanzas e oficio.
No museo atópanse primeiras e raras edicións de libros do autor, manuscritos orixinais, fotografías de época, obxectos de belas artes (escultura, pintura, caricatura), vestiario, escenografías e cartelaría teatral. Ademais, conta cunha sala para exposicións temporais e un auditorio no cal se organizan distintas actividades culturais ao longo do ano.